વડોદરા : વધુ એક વાર ખંડણીખોરોનો આતંક સામે આવ્યો છે. વડોદરામાં મોબાઇલ એસેસરીઝનો વેપાર કરતા વેપારીને એક ટોળકીએ લૂંટી ખંડણીની માંગણી કરી હતી. લૂંટારૂઓની આ ટોળકીએ કરજણમાં દુકાન બતાવવાના નામે વેપારીને લઇ જઇ રસ્તામાં માર મારી 7 લાખ રૂપિયા પડાવ્યા હતા. અને ત્યારબાદ ટોળકીએ વેપારી પાસે 50 લાખની ખંડણીની માંગણી કરી હતી.
ખંડણી દરમિયાન ટોળકીએ જાનથી મારી નાખવાની ધમકીથી ગભરાઇ ગયેલા વેપારીએ પોલીસ ફરિયાદ કરી ન હતી. પરંતુ ટોળકી વલસાડ પોલીસના હાથે ઝડપાઇ જતાં વેપારીએ હાલ પોલીસ ફરિયાદ કરી છે અને ટોળકીના અન્ય આરોપીને ઝડપવા પોલીસે તપાસ આદરી છે.
