કોલેજોમાં 23મીથી શિક્ષણ કાર્ય શરૂ થઇ શકશે કે કેમ તેની અનિશ્ચિતતા. – કોલેજના પ્રિન્સિપાલ એસોસિએશનના હોદ્દેદારો કહે છે સરકારની સૂચના પ્રમાણે કામગીરી થઇ શકે તેમ નથી.

208 Views

અમદાવાદ –           રાજ્ય સરકાર દ્વારા આગામી તા.23મીથી કોલેજોમાં છેલ્લા વર્ષના વિદ્યાર્થીઓને રૂબરૂમાં બોલાવીને અભ્યાસ શરૂ કરવાની જાહેરાત કરી છે. જેના અનુસંધાનમાં ગુજરાત યુનિવર્સિટીએ પણ પરિપત્ર કરીને આ અંગેની સ્પષ્ટતા કરી છે. જુદી જુદી કોલેજોના આચાર્યો કહે છે જે પ્રમાણે સરકારે જાહેરાત કરી છે તે પ્રમાણે કામગીરી કરવા જઇએ તો પ્રોફેસરોએ વિદ્યાર્થીઓએ ઓનલાઇન-ઓફલાઇન એમ, બે વખત અભ્યાસ કરાવવો પડે તેમ છે. આ ઉપરાંત સોશિયલ ડિસ્ટન્સ સહિતના અનેક પ્રશ્નો ઊભા થઇ શકે તેમ છે. આમ છતાં સરકારની તાકીદ છે તેના કારણે કામગીરી કરાશે પરંતુ કામગીરી યોગ્ય રીતે થશે કે નહીં તે નક્કી નથી.

          શિક્ષણ વિભાગ દ્વારા પરિપત્ર જાહેર કરીને 23મી નવેમ્બરથી કોલેજો શરૂ કરવા અને હાલ છેલ્લા વર્ષના વિદ્યાર્થીઓને અભ્યાસ માટે બોલાવવાની તાકીદ કરવામાં આવી છે. કોલેજોએ કયા નિયમોનુ પાલન કરવાનુ તે સહિતની ગાઇડલાઇન પણ જાહેર કરવામાં આવી છે. આ મુદ્દે કોલેજના પ્રિન્સિપાલ એસોસિએશનના હોદ્દેદારો કહે છે સરકારે જે પ્રમાણે સૂચના જાહેર કરી છે તે પ્રમાણે કામગીરી થઇ શકે તેમ નથી. કારણ કે સરકારે હાલ છેલ્લા વર્ષના વિદ્યાર્થીઓને સ્વૈચ્છાએ બોલાવવા કહ્યું છે. એટલે કે જે વિદ્યાર્થીઓ આવવા તૈયાર ન હોય તેમના માટે ઓનલાઇન શિક્ષણની વ્યવસ્થા ચાલુ રાખવામાં આવશે. આ પ્રકારના નિર્ણયના કારણે પ્રોફેસરોએ ઓનલાઇન અને કલાસમાં એમ, બે વખત ભણાવવું પડશે. કયા સમયે કયા વિદ્યાર્થીઓને ભણાવવું તેની સમસ્યા થાય તેમ છે. આ ઉપરાંત ત્રીજા ભાગના  વિદ્યાર્થીઓને જ પહેલા તબક્કામાં બોલાવવાનું નક્કી કરાયુ છે.

          આ નિર્ણયના કારણે પ્રોફેસરોએ વારંવાર એક જ વિદ્યાર્થીઓને એક જ પ્રકારનો અભ્યાસ કરાવવો પડે તેમ છે. જે સંસ્થામાં એક જ કોલેજ ચાલે છે તેમાં 33 ટકાનું પાલન થઇ શકે તેમ છે. પરંતુ શહેરમાં એવા ઘણી સંસ્થાઓ છે કે જેમાં ચાર ચાર કોલેજ ચાલે છે. આ તમામ કોલેજો ત્રીજા ભાગના વિદ્યાર્થીઓને બોલાવે તો પણ એક સમયે દોઢથી બે હજાર વિદ્યાર્થીઓ કેમ્પસમાં ભેગા થાય તેમ છે. આ સિવાય કોલેજમાં કે યુનિવર્સિટીમાં સોશિયલ ડિસ્ટન્સનું પાલન થાય તેની જવાબદારી સંસ્થાના વડા પર નાંખવામા આવી છે. વિદ્યાર્થીઓને માસ્ક પહેરવા માટે ફરજ પાડી શકો પરંતુ સોશિયલ ડિસ્ટન્સનુ પાલન થશે જ તેવી કોઇ વડા ખાતરી આપી શકે તેમ નથી. આમ, સરકારે કરેલા પરિપત્ર પ્રમાણે તા.23મીથી કામગીરી કરવા પ્રયાસ જરૂર કરાશે પરંતુ તે પ્રમાણે થશે તેની કોઇ ગેરંટી નથી. જો આમ, ન થાય તો ફરીવાર પાછુ ઓનલાઇન શિક્ષણ શરૂ કરવુ પડશે.

એકસાથે ક્લાસ ટીચિંગ અને ઓનલાઇન શિક્ષણનો વિકલ્પ અપાશે

          કેટલાક વિદ્યાર્થીઓને ઓનલાઇન અને કેટલાકને ઓફલાઇન શિક્ષણ આપવુ અઘરુ છે. આ સ્થિતિમાં આગામી દિવસોમાં પ્રિન્સિપાલ એસો. દ્વારા સરકાર સમક્ષ એવી દરખાસ્ત કરવામાં આવશે કે, ઓનલાઇન કલાસ ચાલુ હોય તે દરમિયાન જ મોબાઇલ દ્વારા ઘરે રહેલા વિદ્યાર્થીઓને ઓનલાઇન શિક્ષણ આપવામાં આવશે. કારણે આ પ્રકારની પદ્ધતિથી એકસાથે ઓફલાઇન અને ઓનલાઇન બન્ને શિક્ષણ આપી શકાય તેમ છે. આ સિવાય એક વખત ઓનલાઇન અને એક વખત ઓફલાઇન પ્રમાણે બે વખત એક જ વાત શીખવી શકાય તેવી કોઇ શક્યતા નથી.

Leave a Reply

Your email address will not be published. Required fields are marked *