ગુજરાતમાં બેફામ વાહનો હંકારવાના કારણે હિટ એન્ડ રન અને અકસ્માતમાં મોતના બનાવો સતત વધી રહ્યા છે ત્યારે આજે વહેલી સવારે દક્ષિણ ગુજરાતના વલસાડ જિલ્લાના ભિલાડ નજીક બસ, ટ્રક અને ટેમ્પો વચ્ચે ટ્રિપલ ગમખ્વાર અકસ્માત સર્જાયો હતો.
અકસ્માતમાં 3 લોકોના ઘટના સ્થળે કમકમાટી ભર્યા મોત નિપજ્યા છે જ્યારે ઈજાગ્રસ્ત 4 લોકોને તાત્કાલિક 108ની મદદથી સારવાર અર્થે હોસ્પિટલ ખસેડવામાં આવ્યા હતા. અકસ્માતની જાણ થતાં પોલીસે તાત્કાલિક ઘટનાસ્થળે પહોંચી ઈજાગ્રસ્તોને હોસ્પિટલ ખસેડવાની કામગીરી હાથ ધરી હતી.
વલસાડના ભિલાડ નજીક બસ, ટ્રક અને ટેમ્પો વચ્ચે ટ્રિપલ અકસ્માત સર્જાયો હતો, જેમાં ત્રણ લોકોનાં મોત થયાં છે. આ અકસ્માતમાં મૃત્યુ પામનારા મુકેશભાઈ કનાડુ ગામના રહેવાસી છે અને તેઓ પોતાની મ્યુઝિકલ પાર્ટી ચલાવતા હતા તેમજ ભાજપના અગ્રણી છે. ઉમરગામ તાલુકા પંચાયતના સભ્ય છે અને કનાડુ બેઠકના સભ્ય હતા. મુકેશભાઈ પોતાની પત્ની સાથે પરત ફરી રહ્યા હતા એ દરમિયાન તેમને અકસ્માત નડ્યો હતો. અકસ્માતમાં પતિ અને પત્ની બન્નેનાં મોત થયાં છે.જેને લઈ સમગ્ર પંથકમાં શોકનો માહોલ છવાઈ ગયો છે.
