ટ્રાન્સપોર્ટ કમિશનર દ્વારા ગુજરાત ઇલેક્ટ્રિક વાહન નીતિ -2021 ની જાહેરાત કરવામાં આવી છે. તેમણે કહ્યું કે, ઇલેક્ટ્રિક વ્હિકલ પોલિસી અંતર્ગત, જે લોકો સબસિડી મેળવવા માંગતા હોય તેઓએ ડિજિટલ ગુજરાતમાંથી અરજી કરવાની રહેશે.
તાજેતરમાં રાજ્ય સરકાર દ્વારા ગુજરાત સ્ટેટ ઈલેક્ટ્રીક વ્હીકલ પોલીસી-2021 જાહેર કરવામાં આવી છે. જે અંતર્ગત રાજ્યમાં નોંધાયેલા ઈલેક્ટ્રીક વાહનો ખરીદનારને તા. 01 જુલાઇ 2021થી સબસીડી ચુકવવામાં આવશે.
નાગરિકો ઈ-વ્હીકલ પોલીસી-2021 અંતર્ગત સબસીડીનો લાભ મેળવી શકે તે હેતુસર અરજદારોએ ગુજરાત સરકારના digitalgujarat.gov.in પ્લેટફોર્મ પર પોતે ઓનલાઈન અરજી કરી રજીસ્ટ્રેશન કરવાનું રહેશે.
અરજીની સાથે વાહન નોંધણી નંબર, વાહનના માલિકનો મોબાઇલ નંબર અને તેમના નામે બેંક ખાતાનો નંબર અને આઈએફએસસી કોડની વિગતો આપવાની રહેશે. આ ઉપરાંત, રદ થયેલ ચેક / પાસબુકનું પ્રથમ પાન અપલોડ કરવું પડશે. સબસિડી માટે ઓનલાઇન અરજી કરવા માટે કોઈ ફી ચૂકવવાની રહેશે નહીં, તેમ રાજ્યના વાહનવ્યવહાર કમિશનરોની યાદીમાં જણાવાયું છે.
